Una tagga ilangagut uKausittak uKausiusimajuk ullumi Nunatsiavut AngajukKânganut Sarah Leo Nunatsiavut katimajitsuanginnut Hopdelimi.
Labrador Inuit Nunamik Satusainnimut AngiKatigegutinga Maligatsasuanut paigijaulluni allaKutiuvuk. Nalunangitumik tukisititsivuk piKatiKagiaKannitinik tamâginnik kavamatuKammik amma prâvinsiup kavamâginnik. PitaKattisidluni nalugunnainimmik aulatsiKataugunnanimmik nunagijattinik, pigunnatilluta pingutitsisongulinnimik makitatsiatumik tunganattumillu avatimmik pivitsaliugigunnalilluta inoKativut nunalellu pigutsiaKulillugit.
Ippiniagavit, uKâlattek, kavamanga Newfoundland amma Labrador ammalu Vale mânnakolauttuk âkKigiatsilaukKok Tasiujatsuami Pivalliatitsigiamut AngiKatigennimik. Tâtsumona, sâksinga âkKigiattausimajuk angiKatigennimut, kavamanga Newfoundland amma Labrador pigunnatitsinialikKuk Vale-mik aullatitsisongunialittilugu anginitsamik nikallimik ujaganniataminik silatânut prâvinsiup pivitsaliugillutik kampaniujumik akuniunitsak Long Harbour-imi ujaganniatausimajunik suliaKapvik nâmmasiattumik ingiggatigianga. Vale pitaKattisiniakKuk $200 miliun dâlatut kenaujamik tunillugu kavamanganut Newfoundland amma Labrador tauttiutigillugu âkKigiattautitsinimmut, tunitjiniammiluni $30 miliun dâlatut nunalinni pivalliatitsigiamut sivuppiatitsiutimmik.
Kaujimatsiangilagut ilonnatik sunalittâluammangâta sâksingani âkKigiattausimajumi kavamanga Newfoundland amma Labrador Kaitsisimalungimat iluittumik atjinganik angiKatigennimik. Takusimavugut kisimi titigutimut nungutitausimajumik ubvalulonnet ilangâtittausimajop atjinganik.
Taimaigaluattilugu, tukisiavugut unikkausiliuttet Kaujititsiningitigut tainna âkKigiattausimajuk nalâgut Tasiutjatsuap Ujaganniavinga ingiggainanianninganing, atattisiallugit piujumik akiliusiattâgiKattatuit suliatsait unuttunut inuKutittinut. Tamanna piujogaluattilugu, uKâlattek, kavamaulluta taimâk tusattitauniagasugilaungilagut ammalu KuinattojâlilaukKugut Kaujititauttinatalonnet Kaujigatsaliusimalilaummata. Ammalu, uvagut isumattigut, tamanna nalunangitumik siKumitsiniummat Nunamik Satusainnimut AngiKatigegutimmik. Una sulimmijuk, pitaKammat iluittumik allasimajumik iluani uvagut Nunamik Satusainnimut AngiKatigegutittini ilinganiKatsiamagittumik tâtsumunga pivalliagutaulittumut.
Pitjutigillugu tânnaluatsiak âkKigiattausimajuk, uKâlattek, Immigolingajuit 8.6.2 Nunamik Satusainnimut AngiKatigegutinga uKausittaKammat imâk Canada amma Prâvinsik KaujititsigiaKavok Nunatsiavut kavamanganik sivungagut:
- isumatsasiugutiKakKâgatik tatattugatsamik Pigunnautimut upvalu asinginnut suliatsanut upvalu piusigijauKattatunut Tasiujatsuami; upvalu
- ilisinimmut Kanuilingausitsanik upvalu âkKigiagutimut Pigunnautimut upvalu sakKititsigiamut pikKujiusimik ilingajumik Tasiujatsuami Suliatsanut upvalu asinginnut suliatsanut upvalu piusigijauKattatunut Tasiujatsuami.
Malillugu Nunamik Satusainnimut AngiKatigegutinga, KaujimaKatigennik tukiKavuk pivitsaKattisinnik:
- kinatuinnamik KaujititaugiaKajumik, KaujititaugiaKalippat suna pitjutigijaujuk kajusittitaugiaKanninganut âkKitausimatsiatillugu ammalu tukisinatsiatillugu pivitsaKattigasuamut tainna kinatuinnak atuinnaguttisiutjigiamut Kanuk isumaKautiKammangâmmi pitjutigijaujumut;
- nâmmasiagasuattumik pivitsaKattitaugasuattilugu tainna kinatuinnak KaujititaugiaKajuk, atuinnaguttisiutjigiamut Kanuk isumaKautiKammangâmmi pitjutigijaujumut, ammalu pivitsaKattitautsialuni taikkuninga isumagijamminik âtsisongugiamut Kaujititsisimajunut; amma
- ilonnâgut ammalu tunganatsiatumik isumatsasiugunnasiattitauKattaluni kinatuinnamut isumagijamminik sakKititsigiaKakKâtinnagu.
Tamakkua uKausiuKattasimagalualittilugit atjigingimagittanginnik AngajukKâsuamut prâvinsiujumi Ministaujunut, uKâlattek, uvagulli pitsiatumik Kaujititausimalungilagut, ammaluttauk kavamaulluta KujanâtsituinnagiaKangilagut tamatsuminga nalunangitumik siKumitsinimmik uvagut Nunamik Satusainnimut AngiKatigegutinganik.
Kaujititsijutsaugivunga tamanna tagga atausialluni kavamanga Newfoundland amma Labrador Kipilusimaninganik malikKujaugasuagami Nunamik Satusainnimut AngiKatigetutinganik. Tâvatualli uKautitsiagunnaKasi, uKâlattek, ilonnaitalu ilaliutisimajut katimajitsuanut, tamanna Kujanâtuinnaniangitaga. Tâtsuma kavamanga Newfoundland pasijatsautitaugialik; nâlagialik uvagut Nunamik Satusainnimut AngiKatigegutittinik; ammalu sulijutsagialik uvagut kavamattinik inuKutittinillu.
Tâtsuma kavamanga Newfoundland amma Labrador tukisigialik imâk tânna Labrador Inuit Nunamik Satusainnimut AngiKatigegutinga maligatsatigut atunniKattitautsiagialik, Maligatsasuanut paigijaulluni allaKutiuvuk. Tâkkua allaKutet maligatsanguatuinnaulungimata.