IluvitsijuKalâkKuk Donerstâgimi KipukKami ikKaumallugu inosigilauttanga Nunatsiavummiuk ilitagijautsiajuk Inuk inutuKak.
Silpa Edmunds (atigusinga Sillitt) panigijaulauttuk Jerry Sillitt-imut OKamiuk ammalu Esther Tuttu. Inolisimajuk Hopedalemi Mertz 31, 1932-mi ammalu jârikKutunippaulauttuk nukaminit Tama Winters (mânnaKamik ajulilauttuk), Justine Adams, ammalu Matilda Maynard. IlauKatausimajuk aullatitaudluni ilinniavimmut Makkovimmi ammalu suliaKaKattadluni Moraviamiut Misiuningani Hopedalemi. Aippatâlauttuk Tom Edmundsimik KipukKamiuk December 10, 1953-mi Hopedalemi, KitungaKalauttuk 14-nik, nainait suli ullumi inojut.
Mrs. Edmunds KanuttogutiKatsialauttuk ikajutsisiadlunilu Inuktitut uKausinik ammalu Inuit kavamaligitillugit ammalu inuit pivitsanginnik. Namutuinnak aiKattalauttuk ilonnâni Canadami ikajutsisiadluni piunitsamik pijaukKulugit Inuit ammalu ilaunginnadluni Labradorimi Inuit katutjiKatigenninganut, OKâlaKatiget Society, Inuit Tapirisat Kanatami, Torngâsok IlikKusiligijingita SuliaKapvingani, Pauktuutit ammalu Torngat Avittusimajuni Illuligijingita katutjiKatigengani.
“Silpa ilitagijautsialauttuk ilonnâni Nunatsiavut ammalu nanituinnak,” uKajuk Nunatsiavut AngajukKânga Sarah Leo. “Pitsatujummagiulauttuk ikajutsijiudluni Inuit pivitsanginnik, piluattumik pivitsangit annait, uKausivut ilikKusittinillu. Kangusulautsimalaungituk isumagijaminik uKagiamik ubvalu uKautiKalluni KaujimajatuKaminik ilisimajaminillu. Ikajutsinigisimajanga Labradorimi Inunnik puiguttauniangituk.
“kiggatullunga Ikajuttaugutilinnik Labradorimi Inuit Nunamik Satusaijet AngiKatigegutingani, salutitsivunga kitsajunik Silpa ilanginnik ammalu unuttunik nanituinnâjunik ilannânginnik.”
Kaujigatsanut Apitsutausok:
Bert Pomeroy
Aulatsiji Kaujimattisigiamut
(709) 896-8582