Nunatsiavut kavamanga KunommiutiKasimajuk Kinuagijausimajunik Kinugautinik (RFP) âkKitaugiaKammata suli nutâtsamut atuttaugatsamut, imappimi atjatugiamik inuttaKattalunilu umiatsuamik atuttaugatsak nunalinni Labrador taggâni satjugiangani.

“UKautijauKattasimalikKugut maggoni jâriusimalittoni nutâk umiatsuasammik, asitsanganik nutaungitolittop MV Northern Ranger, sivullipautijaugiaKasimajuk kavamanganut Newfoundland Labradoriullu,” uKajuk Nunatsiavut AngajukKâp Tullia Minister, Darryl Shiwak.  “UppititaulilaukKugut RFP sakKititaulânninganik upingasângusimajumi, tâvatuak taimailaungituk.  UKautijaulaukKugut katimajuni taimanganit RFP sakKititaulânninganik nâningani October.  Ammalu, tamannaulaungituk.  Prâvinsimi kavamaujuk sukkailivalliatuinnalittuk tamanna pitjutigidlugu.”

Prâvinsimi Ingiggautiligijet ammalu Suliatsaliginimmut Minister Nick McGrath uKalauttok Dienestâgimi katimajitsuat Illusuangani nigiunimminik RFP sakKititaulânninganik nâningani jâriup.

Metwochimi, Minister uKalauttuk aittuinimminik $51 miliun dâlanik sanagiamut nutâmik 80 metre umiatsuamik pitsanganik Fogo Islandikut ammalu Change Islandikut atugatsanganik, ammalu satusaigiallagumadlutik kingullianik 80 metre umiatsuamik pitsanganik Bell Island atjatotitsanganik.  Ammalu, uKadluni asigiallanganik $10 miliun dâlanik kenaujaliugiamut sanagiallugit itsavet Bell Islandimi ammalu Portugal Covemi nutâtsamut umiatsuasamut.

Nunatsiavut AngajukKânga Sarah Leo uKâlaKatiKakKaujuk Minister McGrathmik ullumi uKautidlugu Kanuttogijaminik kingugaisimaninganik RFP.  Minister uKasimajuk Kanuttogijaminik, tâvatuak uKagunnangituk Kangatsiak ullusaKagajammangât sakKititaulluni Kinugautik RFP.

“Imappimi atjatotet atuttaulagivut inunnut taggâni satjugiammi,” uKajuk AngajukKâk.  “Akuninut uKumaitsasimalikKugut atuKattajattinik atjatotinik, atuttausiagajattumik pannaigutiKagata uKautigigiangit pitjutaujuit ulugiannatovut suli piungilualutik sakKigajammata.”

Taggâni satjugiammi piungilutausimalikKut unuttut uKumailutait jârini Kângisimalittuni.  IggaviligiKattadlutik, ammalu ikuallaKattadluni Northern Ranger, uKumailutausimalikKut atuttaugasuajut maggoni jâriusimalittoni, KimainnaigiaKaKattadluni inuttajaminik – tamâginnilu imammi imappimillu. UKumailutaujut sukkailititsisimavut atjatunninganik ammalu pigumajaudlatunik atjataujunik niuviatsanik, sakKititsidlutik ukiumi atuttaugatsanik tikiutjigunnangininga matukKâtinnagu atjatuvitsak jârimi.

“Inuit Nunatsiavummi ammalu, inulluasiangit Labradorimi, KinuitsâsimalikKut utaKidlutik atutsiagajattumik imappimi atjatuttisammik ininganottaugatsamik,” uKajuk AngajukKâp Tullia Minister.  “KunommingatsiamagilikKugut, uppititaulilaugatta, tamanna sollu sivullipautijaugiaKangininganik kavamanganut Newfoundland Labradoriullu.”

Tusagatsanik Kaujimattisiji:
Bert Pomeroy
Aulatsiji Kaujigatsanik
(709) 896-8582