Nunatsiavut kavamanga ilitagijaugutittâsimajuk Ukiuttatumik Aulatjainimmut Ilitagijaugutimmik suliagijamini, SakKijânginnatuk Nunalik: Inositsiagittogasuannik Angigaujuni Piggagasuanningit Nunatsiavut Nunalinginni. Ilitagijaugutik, akilik $350,000-tut, ilangauvuk pingasunit uKautaujuk unnusa ullusiujuni ilauKatiget ArcticNet’s nainangani Jâri Tamât Kaujisannimut katimatillugit Halifaximi.
“Nunatsiavut kavamanga pisittungituk ammalu Kuviasudluni nakutsadlutik tâtsuminga ilitagijaugutimmik,” uKajuk AngajukKâk Sarah Leo. “Ikajutsiniattuk uvattinik ikajuttitinnilu pivallianittini sakKijânginnaniattuk illusanut sittutitsiutitsak Nunatsiavummiuni ammalu nunagijattini.
“SakKijânginnatuk Nunalik tataminattuk ottotigillugu Kaujisasimajut piunitsamik ilingajunik Inunnut,” uKagiallajuk AngajukKâk. “Nakummegumavunga suliaKappâsimajunik ilisimatsiajut suliagippâsimajamini suliatsaujumi, ammalu nakummelugit tânna ilitagijaugutik pitâgijaugunnasimammat.
Angijummagik SakKijânginnatuk Nunalik (Sustainable Communities) suliatsak tugâgutiKavuk pivalliagiamik Inuit KaujimajatuKanginnik ullumi illusaujuni Nunatsiavummi takutitsigunnalutik Kaujisannituinnamiulungituk ammalu piujunik atuttaugunnatunik pannaigiamut atuliaKititsinimmulu nunamettunik sakKijânginnaniattunik nunalinni, ammalu inunnik kenaujaliugutinut ikajuttaugutinik ikumatigut, inositsiagittogasuannimut angiggaujuit sanajausimajut Inunnut, ilingajunut Inunnut.
“IllusaKanginik pimmagiuvuk pitjutaudluni nunagijattini ullumi,” uKajuk SakKijânginnatuk Nunalik sivukkatattinga Isabella Pain, tigusijuk ilitagijaugutimmik kiggatullugit Nunatsiavut kavamanga. “UKumaittumagimmevugut, ammalu atuttauKattajut uKumailutait ikpiniattisiKattavut pitsatuninganik Nunatsiavummi angiggaKangitunut ammalu anginippâmik illuni, uKautaujut nanituinnâningit avittusimajuni, attutaujut ilonnatik nunalet inosingit ammalu attutauKattajut inosingit ilonnâni Nunatsiavummiuni.”
SakKijânginnatuk Nunalik pannaijuk atugiamik ilitagijaugutimmik kenaujamik ikajugiamut sanallutik ammalu kamagillugit sivullipautijaugialet sakKijânginnaniattut, unuttut illuit tujummiuvitsait inigijaugialet ammalu sakKititsilutik sivullipâmik atuttaugunnatut Taggâni illusanik pivallianimmut ammalu kamagillugit silak asianguvallianinga, illusait pigumajaujuit ammalu Inuit illusangit pigumajaujut ammalu pigumajaugajattut ilingavut ilonnâni nunatsuami.
Ilagiallugu Nunatsiavut kavamanga, SakKijânginnaniattuk Nunalik katimajingit ilautitsivuk Nunatsiavut Ikajuttigengit Aulatsijet katimajet, Nainimi Kaujisapvik SuliaKapvik ammalu Kaujisattet Memorial Ilinniavitsuanganit.
SakKititaulauttuk 2012-mi, Ukiuttatumi Aulatjaigutik Ilitagijaugutik ikajutsiKattavuk suliatsak atudlutik piusituKaujunik KaujimajaujutuKanik ammalu Kaujisadlutik ikajutsigiamut Canadami Ukiuttatumiut ammalu inutuKangit. Tugâgutinga $1 miliun dâla katillugu ilitagijaugutik ikajutsigiamut sâlaKajunik katimajiujunik atuliaKinitsangit pannaigutimik suliaKallutik. Aulataujut akilittutaugatik ikajuKattajunut ArcticNet, SuliaKaKatiget SuliaKapvimi Piujummagik Canadami ilautitsiKattajuk Kaujisattinik ammalu aulatsijiujunik nunami, inuit inositsiagittonitsangit ammalu inulinni Kaujisagiamik ikajuttingillu Inuit katutjiKatigengit, taggâni nunalet, federal ammalu prâvinsimi katutjiKatiget ammalu namminilet ilauKataujut. Tugâgutinga ArcticNet Kaujisagiamut attutauniuKattajunik silak asianguvallianinganut ammalu ullumiulittuk atugatsanik satjugiani Canadamiuni Ukiuttatumiut.
Kaujigatsanik kamaji:
Bert Pomeroy
Aulatsijinga Kaujimatitsigiamut
(709) 896-8582